വികസനം എണ്ണിപ്പറഞ്ഞ് മുഖ്യമന്ത്രി ടൈം സ്‌ക്വയറില്‍ (ഷോളി കുമ്പിളുവേലി)

ന്യൂയോര്‍ക്ക്: കഴിഞ്ഞ ഏഴു വര്‍ഷംങ്ങള്‍ കൊണ്ട് നാട്ടില്‍ വലിയ വികസന കുതിപ്പ് ഉണ്ടായതായി മുഖ്യമന്ത്രി പിണറായി വിജയന്‍ പറഞ്ഞു. 2016 വരെ നാട്ടില്‍ ഒന്നും നടക്കില്ല എന്ന ഒരു ധാരണയായിരുന്നു. എന്നാല്‍ തന്റെ നേതൃത്വത്തിലുള്ള ഇടതുപക്ഷ സര്‍ക്കാര്‍ അധികാരത്തില്‍ വന്നതിനുശേഷം പഴയ ധാരണ മാറിയെന്നും, മുടങ്ങിക്കടന്നിരുന്ന പദ്ധതികള്‍ എല്ലാം പൂര്‍ത്തിയാക്കിയതായും അദ്ദേഹം പറഞ്ഞു.

കഴിഞ്ഞ മൂന്നു ദിവസമായി ന്യൂയോര്‍ക്കില്‍ നടന്നുവന്നിരുന്ന ലോക കേരള സഭാ സമ്മേളനത്തിന്റെ സമാപന സമ്മേളനം ടൈം സ്‌ക്വയറില്‍ ഉദ്ഘാടനം ചെയ്തു സംസാരിക്കുകയായിരുന്നു മുഖ്യമന്ത്രി.

എല്‍.ഡി.എഫ് ജനങ്ങള്‍ക്ക് നല്‍കിയ 600 വാഗ്ദാനങ്ങളില്‍ 580 ഉം പൂര്‍ത്തീകരിച്ചതായി പിണറായി വിജയന്‍ അവകാശപ്പെട്ടു. തൊഴിലില്ലായ്മ 12 ശതമാനത്തില്‍ നിന്ന് 5 ശതമാനമായി കുറച്ചു. 2025ഓടെ പരമ ദരിദ്രരില്ലാത്ത സംസ്ഥാനമായി കേരളത്തെ മാറ്റുമെന്നും മുഖ്യമന്ത്രി പറഞ്ഞു. അഴിമതി കുറച്ചുകൊണ്ടുവരാന്‍ സാധിച്ചിട്ടുണ്ട്; എന്നാല്‍ അഴിമതി തീരെ ഇല്ലാത്ത സംസ്ഥാനമാക്കി കേരളത്തെ മാറ്റുക എന്നതാണ് തന്റെ ലക്ഷ്യമെന്ന് അദ്ദേഹം പ്രസ്താവിച്ചു. മുന്‍ സര്‍ക്കാരിന്റെ കാലത്ത് 600 രൂപയായിരുന്ന പെന്‍ഷന്‍ 1600 രൂപയാക്കി ഉയര്‍ത്തിയതായും, അത് മുടങ്ങാതെ 63 ലക്ഷം ആളുകള്‍ക്ക് ലഭിക്കുന്നതായും മുഖ്യമന്ത്രി അവകാശപ്പെട്ടു.

ചടങ്ങില്‍ നിയമസഭാ സ്പീക്കര്‍ എ.എന്‍. ഷംസീര്‍ അധ്യക്ഷത വഹിച്ചു. ധനകാര്യമന്ത്രി കെ.എന്‍. ബാലഗോപാല്‍, നോര്‍ക്ക വൈസ് ചെയര്‍മാന്‍ പി. ശ്രീരാമകൃഷ്ണന്‍, ജോസ് കെ. മാണി എം.പി, ജോണ്‍ ബ്രിട്ടാസ് എം.പി, ജോബ് മൈക്കിള്‍ എം.എല്‍.എ, ചീഫ് സെക്രട്ടറി ഡോ. വി.പി ജോയി, വേണു രാജാമണി, കെ. വാസുകി തുടങ്ങിയവര്‍ ചടങ്ങില്‍ സന്നിഹിതരായിരുന്നു.