ന്യു യോര്ക്ക്: ഫോമാ ഇലക്ഷനില് എമ്പയര് റീജിയനില് ഒരു വോട്ടിനെചൊല്ലി പരാതി. ആര്.വി.പി. ആയി ജയിച്ച ഷോബി ഐസക്കിനു 28 വോട്ടും എതിര് സ്ഥാനാര്ത്ഥി മോളമ്മ വര്ഗീസിനു 27 വോട്ടും എന്നാണു ഇലക്ഷന് കമ്മീഷന് പ്രഖ്യാപിച്ചത്.
എന്നാല് റീജിയനില് 54 വോട്ടുകളെയുള്ളുവെന്നു മോളമ്മ വര്ഗീസും ഭര്ത്താവ് മോന്സി വര്ഗീസും ചൂണ്ടിക്കാട്ടുന്നു. പ്രഖ്യാപനം അനുസരിച്ച് 55 വോട്ട് വേണം.
റീജിയനില് 7 അസോസിയേഷനുകളാണുള്ളത്. ഒന്നിനു ഏഴു ഡലിഗേറ്റ് വച്ച് 49 പേര്. ഇതു കൂടാതെ റീജിയനില് നിന്നുള്ള ദേശീയ ട്രഷറര്, 2 നാഷണല് കമ്മിറ്റി അംഗങ്ങള്, യൂത്ത് പ്രതിനിധി, ആര്.വി.പി എന്നിവര്ക്ക് ഓരോ വോട്ടുമാണുള്ളത്. മൊത്തം 49 +5 =54.
അങ്ങനെയെങ്കില് ഒരു വോട്ട് അധികമായി വന്നു. ഇതിന്റെ വസ്തുത കണ്ടെത്തണമെന്നാവശ്യപ്പെട്ട് സ്ഥാനാര്ഥി ഇലക്ഷന് കമ്മീഷനു പരാതി നല്കി. ഇക്കാര്യം പരിശോധിച്ച് ഉടന് മറുപടി നല്കാമെന്ന് ചീഫ് ഇലക്ഷന് കമ്മീഷണര് ജോര്ജ് മാത്യു അറിയിച്ചതായി മോളമ്മ വര്ഗീസ് പറഞ്ഞു.
ഒരു വോട്ട് അസാധു എന്നു കണ്ടാല് ഇരുവര്ക്കും 27 വോട്ട് വീതമാകും. ആ സാഹചര്യത്തില് വിജയിയെ എങ്ങനെ തീരുമാനിക്കണമെന്നത് പ്രശ്നമാകും.