ഫഹാഹീല്‍: മില്ലേനിയം ക്രിക്കറ്റ് ക്ലബ് ഫഹാഹീല്‍ ഗ്രൗണ്ടില്‍ വച്ചു നടത്തിയ റിനൗസ് മെമ്മോറിയല്‍ ട്രോഫി ടി 20 ക്രിക്കറ്റ് ടൂര്‍ണമെന്റ് ഫൈനലില്‍ കുല്‍ന ടൈറ്റന്‍സിനെ 35 റണ്‍സിന് പരാജയപ്പെടുത്തിയാണ് റൈസിംഗ് സ്റ്റാര്‍ സി സി കുവൈറ്റ് വിജയികളായത്. ടോസ് നേടി ആദ്യം ബാറ്റിങ്ങ് തിരഞ്ഞെടുത്ത റൈസിംഗ് സ്റ്റാര്‍ സി സി കുവൈറ്റ് 9 വിക്കറ്റ് നഷ്ടത്തില്‍ 177 റണ്‍സ് നേടി. 28 പന്തില്‍ 52 റണ്‍സ് എടുത്ത ഗിരീഷ് സുധാകരന്‍ ആണ് ടോപ് സ്‌കോറര്‍. മറുപടി ബാറ്റിങ്ങിനിറങ്ങിയ കുല്‍ന ടൈറ്റന്‍സിനെ 142 റണ്‍സിന് ഓള്‍ ഔട്ട് ആക്കി 35 റണ്‍സിന്റെ മികച്ച വിജയം നേടുകയായിരുന്നു. 4 ഓവറില്‍ 22 വഴങ്ങി 4 വിക്കറ്റ് എടുത്ത വിപിന്‍ രാജേന്ദ്രന്‍ ആണ് ഫൈനലിലെ താരം.

 

ഈ കഴിഞ്ഞ വര്‍ഷം ഫഹാഹീല്‍ ഗ്രൗണ്ടില്‍ വച്ച് കളിക്കിടയില്‍ ശാരീരികാസ്വാസ്ഥ്യം അനുഭവപ്പെടുകയും ആശുപത്രിയില്‍ എത്തിക്കും മുന്‍പേ മരണപ്പെട്ട സഹതാരത്തിന്റെ സ്മരണക്കായാണ് മില്ലേനിയം ക്രിക്കറ്റ് ക്ലബ് ഇത്തരത്തില്‍ ഒരു ടൂര്‍ണമെന്റ് സംഘടിപ്പിച്ചത്. സാഹിറ കോളേജ് മവാനില്ല (കുവൈറ്റ് ഓള്‍ഡ് ബോയ്‌സ് അസോസിയേഷന്‍) ആണ് ടൂര്‍ണമെന്റ് സ്‌പോണ്‍സര്‍ ചെയ്തത്. വരും കാലങ്ങളില്‍ കൂടുതല്‍ ടൂര്‍ണമെന്റുകള്‍ സംഘടിപ്പിക്കാനുള്ള ഒരുക്കങ്ങള്‍ ആരംഭിച്ചുകഴിഞ്ഞു എന്ന് സാഹിറ കോളേജ് മവാനില്ല പബ്ബിക് റിലേഷന്‍സ് മാനേജര്‍ അറൂസ്   അവാര്‍ഡ് ദാന ചടങ്ങ് ഉത്ഘാടനം ചെയ്തുകൊണ്ട് സംസാരിച്ചു.

 

അവാര്‍ഡ് ദാനച്ചടങ്ങില്‍ ക്ലബ് മാനേജര്‍ ജയന്താ അധ്യക്ഷത വഹിച്ചു.

ഏറ്റവും പ്രിയപ്പെട്ട സഹതാരത്തിന്റെ സ്മരണനിലനിര്‍ത്താന്‍ ക്രിക്കറ്റ് ടൂര്‍ണമെന്റ് സംഘടിപ്പിച്ച മില്ലേനിയം സ്റ്റാര്‍സ് ക്രിക്കറ്റ് ക്ലബ്ബിനെ റൈസിംഗ് സ്റ്റാര്‍ സി സി കുവൈറ്റ് ക്യാപ്റ്റന്‍ ബിജു സി എ ചടങ്ങില്‍ അഭിനന്ദിച്ചു.

 

മത്സരത്തിലെ വിജയികള്‍ക്കുള്ള ട്രോഫി വിതരണം സാഹിറ കോളേജ് മവാനില്ല പബ്ബിക് റിലേഷന്‍സ് മാനേജര്‍ അറൂസ് നിര്‍വഹിച്ചു. ടൂര്‍ണമെന്റിലെ മികച്ച ബാറ്റ്‌സ്മാന്‍ റഫീഖിനും മികച്ച ബൗളര്‍ ഹുസൈനും ഉള്ള അവാര്‍ഡ് ചടങ്ങില്‍ ജയന്ത് കൈമാറി.