തന്നെ സോഷ്യല് മീഡിയയിലൂടെ അപമാനിക്കാന് ശ്രമിച്ച ആള്ക്ക് മറുപടിയുമായി മാധവന്. താരം മദ്യപാനത്തിനും മയക്കുമരുന്നിനും അടിമയായിരുന്നെന്നും അതാണ് കരിയര് തകര്ത്തത് എന്നുമായിരുന്നു ഇയാളുടെ ആരോപണം. ഈ ട്വീറ്റ് സോഷ്യല് മീഡിയയില് വൈറലായതിന് പിന്നാലെയാണ് താരം തന്നെ മറുപടിയുമായി രംഗത്തെത്തിയത്.
മാഡിയുടെ ആരാധകനായിരുന്നു ഞാന്. എന്നാല് മദ്യത്തിനും മയക്കുമരുന്നിനും അടിമയായി അദ്ദേഹം സ്വന്തം കരിയര് തകര്ത്തത് തികച്ചും ഹൃദയഭേദകമാണ്. ബോളിവുഡില് എത്തിയതിന് ശേഷമാണ് മാധവന് നശിച്ചത് എന്നായിരുന്നു 'ആരാധകന്റെ കണ്ടെത്തല്'.
ഈ ട്വീറ്റ് വ്യാപകമായി റീട്വീറ്റ് ചെയ്യപ്പെടുകയും വലിയ ചര്ച്ചകള്ക്ക് കാരണമാവുകയും ചെയ്തു. അതോടെയാണ് താരത്തിന്റെ മറുപടി എത്തിയത്.
ഓ.. ഇതാണോ നിങ്ങളുടെ രോഗനിര്ണ്ണയം? എനിക്ക് നിങ്ങള് രോഗികളുടെ കാര്യം ആലോചിച്ച് വിഷമം തോന്നുന്നു. നിങ്ങള്ക്കാണ് ഒരു ഡോക്ടറെ കാണേണ്ടതിന്റെ ആവശ്യമെന്ന് തോന്നുന്നു- മാധവന് കുറിച്ചു.
തന്നെക്കുറിച്ചുള്ള ആരോപണത്തിന്റെ ട്വീറ്റ് ഷെയര് ചെയ്തുകൊണ്ടായിരുന്നു പ്രതികരണം. താരത്തിന് പിന്തുണയുമായി നിരവധി പേര് രംഗത്തെത്തി. ഒരു കാരണവുമില്ലാതെ ഇത്തരത്തില് വ്യക്തിഹത്യ ചെയ്യുന്നവര്ക്കെതിരെ നടപടിയെടുക്കണമെന്ന് അവര് ആവശ്യപ്പെട്ടു. അതിന് പിന്നാലെ ആ അക്കൗണ്ടു തന്നെ അപ്രത്യക്ഷമായി.
മാധവന്റെ പുതിയ ചിത്രം മാര ഓണ്ലൈനിലൂടെ റിലീസിന് ഒരുങ്ങുകയാണ്. ആമസോണ് പ്രൈമിലൂടെ ജനുവരി എട്ടിനാണ് ചിത്രം ആരാധകരിലേക്ക് എത്തുന്നത്. ദുല്ഖര് സല്മാനും പാര്വതിയും പ്രധാന കഥാപാത്രങ്ങളായി എത്തിയ മാര്ട്ടിന് പ്രക്കാട്ടിന്റെ ചാര്ളിയുടെ റീമേക്കാണ് ചിത്രം.