സ്വപ്ന സഞ്ചാരി ( കവിത : ശ്രീകല ഭട്ടതിരിപ്പാട് )

ഞാനൊരു യാത്രയിലാണ്

ഭാരമേറിയ ഭാണ്ഡവുമായി ,

സ്വപ്നങ്ങളുടെ ഭാണ്ഡവുമായി

അതു വളര മുഷിഞ്ഞതാണ്

കാലങ്ങളായി കൂടെയുള്ളതു കൊണ്ടാകാം

പിഞ്ഞിയിട്ടുമുണ്ട് ,

ചിലയിടങ്ങളില്‍

എന്റെ ധൈര്യമാണീ ഭാണ്ഡം..

ശൈശവത്തിലേ കരിഞ്ഞു പോയവ

പൊഴിഞ്ഞു പോയവ

എറിഞ്ഞു കളഞ്ഞവ

ശേഷിക്കുന്നതില്‍ ചിലത്

ഉറക്കം കെടുത്താറുണ്ട്

ചിരിക്കാനും കരയാനും

ഓര്‍മ്മിപ്പിക്കാറുണ്ട്

ചിലതൊക്കെ വീര്‍പ്പു മുട്ടിക്കാറുമുണ്ട്

എങ്കിലുമി ഭാണ്ഡം ഞാനുപേക്ഷിക്കില്ല,

ഈ ഭാണ്ഡമില്ലെങ്കില്‍

പിന്നെ

ഞാനുമില്ല..

( കോട്ടയം, കുമാരനല്ലൂര്‍ ദേവിവിലാസം ഹൈസ്കൂളിലെ അധ്യാപികയായ ശ്രീകല സൂര്യകാലടി മന ജയസൂര്യൻ ഭട്ടതിരിപ്പാടിന്റെ പത്നിയാണ് )