ന്യൂഡല്ഹി: ഷഹീന്ബാഗിലെ പ്രതിഷേധക്കാര്ക്കെതിരെ നടത്തിയ പരാമര്ശം വിവാദമായതിനു പിന്നാലെ ബി.ജെ.പി എം.പി പര്വേഷ് വര്മ വീണ്ടും വിവാദത്തില്. ഡല്ഹി മുഖ്യമന്ത്രി അരവിന്ദ് കെജ്രിവാളിനെ തീവ്രവാദിയെന്ന് വിളിച്ചാണ് ഇപ്പോള് വിവാദത്തിലായിരിക്കുന്നത്. ഡല്ഹിയില് സംഘടിപ്പിച്ച റാലിയില് സംസാരിക്കുമ്ബോഴായിരുന്നു പാര്വേഷ് കെജ്രിവാളിനെതിരെ തീവ്രവാദി പരാമര്ശം നടത്തിയത്.
ഡല്ഹിയില് കെജ്രിവാളിനെ പോലെ നിരവധി തീവ്രവാദികള് ഒളിച്ചിരിക്കുന്നുണ്ടെന്നും കശ്മീരിലെ തീവ്രവാദികളുമായി ഏറ്റുമുട്ടണോ, ഡല്ഹിയിലെ തീവ്രവാദിയായ കെജ്രിവാളിനോട് ഏറ്റുമുട്ടണോ എന്ന് തനിക്ക് മനസിലാവുന്നില്ലെന്നുമായിരുന്നു പര്വേഷിന്െറ പ്രസ്താവന.
പൗരത്വ ഭേദഗതി നിയത്തിനെതിരെ ഷഹീന്ബാഗില് നടക്കുന്ന പ്രതിഷേധത്തെ പിന്തുണച്ച ഡല്ഹി മുഖ്യമന്ത്രി അരവിന്ദ് കെജ്രിവാളിനും ഉപമുഖ്യമന്ത്രി മനീഷ് സിസോദിയക്കുമെതിരെ പര്വേഷ് രംഗത്തു വന്നിരുന്നു. ഫെബ്രുവരി എട്ടിന് ആര്ക്ക് വോട്ട് നല്കണമെന് രാജ്യ തലസ്ഥാനത്തെ ജനങ്ങള്ക്ക് തീരുമാനിക്കാനുള്ള സമയമാണിപ്പോഴെന്നും അദ്ദേഹം പറഞ്ഞിരുന്നു.
ഷഹീന്ബാഗിലെ പ്രതിഷേധക്കാരെ പര്വേഷ് വര്മ ബലാത്സംഗ വീരന്മാരെന്നും കൊലപാതകികളെന്നും വിളിച്ചത് വന് വിവാദമായിരുന്നു. ലക്ഷക്കണക്കിന് ആളുകള് ഷഹീന്ബാഗില് ഒത്തുകൂടിയിട്ടുണ്ടെന്നും അവര് നിങ്ങളുടെ വീടുകളില് കയറി സഹോദരിമാരേയും പെണ്കുട്ടികളേയും ബലാത്സംഗം ചെയ്യുമെന്നും ജനങ്ങള്ക്ക് ഇപ്പോള് തീരുമാനിക്കാം എന്നുമായിരുന്നു പര്വേഷിന്െറ പ്രസ്താവന.
ഫെബ്രുവരി 11ന് ബി.ജെ.പിയാണ് അധികാരത്തില് വരുന്നതെങ്കില് ഒരു മണിക്കൂര് കൊണ്ട് പ്രതിഷേധക്കാരെ നീക്കം ചെയ്യുമെന്നും അദ്ദേഹം പറഞ്ഞിരുന്നു.