Image

യുക്മ 'കേരളാ പൂരം 2020' വള്ളംകളി ജൂണ്‍ 20 ന്

Published on 15 January, 2020
യുക്മ 'കേരളാ പൂരം 2020' വള്ളംകളി ജൂണ്‍ 20 ന്

ലണ്ടന്‍: യുകെയിലെ മലയാളി സംഘടനകളുടെ ദേശീയ കൂട്ടായ്മയായ യുക്മയുടെ നേതൃത്വത്തില്‍ തുടര്‍ച്ചയായ നാലാം തവണയും വള്ളംകളിയും കേരള കാര്‍ണിവലും യുക്മ 'കേരളാ പൂരം 2020' ജൂണ്‍ 20 നു (ശനി) നടക്കും.

യുകെ സന്ദര്‍ശനമധ്യേ കേന്ദ്ര വിദേശകാര്യ സഹമന്ത്രി വി. മുരളീധരനാണ് 'കേരളാ പൂരം 2020' ന്റെ ഔദ്യോഗീക പ്രഖ്യാപനം നടത്തിയത്. യുക്മ ദേശീയ പ്രസിഡന്റ് മനോജ് കുമാര്‍ പിള്ള, ജലമേളകളുടെ ജനറല്‍ കണ്‍വീനര്‍ അഡ്വ. എബി സെബാസ്റ്റ്യന്‍ എന്നിവര്‍ 'കേരളാ പൂരം 2020' നടക്കുന്നതിന്റെ തീയതി അടങ്ങിയ ലോഗോ കേന്ദ്രമന്ത്രിയില്‍നിന്നും ഏറ്റുവാങ്ങി.

2017ല്‍ യൂറോപ്പിലാദ്യമായി ബ്രിട്ടന്റെ മണ്ണില്‍ നടത്തപ്പെട്ട യുക്മ വള്ളംകളി, മലയാളികള്‍ക്കൊപ്പം കേരളത്തിന്റെ തനത് പാരമ്പ്യര്യം ഇഷ്ടപ്പെടുന്ന തദ്ദേശീയര്‍ക്കും ആവേശം പകര്‍ന്നിരുന്നു. എല്ലാ മലയാളികള്‍ക്കും ആഘോഷിക്കുന്നതിനുള്ള അവസരം എന്ന നിലയില്‍ ശ്രദ്ധേയമായ ജലമേള, കേരളീയ കലാരൂപങ്ങള്‍ ഉള്‍പ്പെടുന്ന ഘോഷയാത്രയുടെയും കുട്ടികള്‍കള്‍ക്കും മുതിര്‍ന്നവര്‍ക്കും ഉല്ലസിക്കാനുതകുന്ന കാര്‍ണിവലിന്റെയുമെല്ലാം അകമ്പടിയോടെയാവും ഈ വര്‍ഷവും അരങ്ങേറുക.

യുക്മ 'കേരളാ പൂരം 2020'ന്റെ പ്രചാരണത്തിനോടനുബന്ധിച്ച് നടത്തപ്പെടുന്ന റോഡ് ഷോയുടെ ഉദ്ഘാടനം ഫെബ്രുവരി 1 നു (ശനി) ലണ്ടനില്‍ നടക്കുന്ന 'ആദരസന്ധ്യ 2020' വേദിയില്‍ നടക്കും. മത്സരവള്ളംകളിയുടെ പ്രചാരണാര്‍ഥം യുകെയിലെ എല്ലാ പ്രധാന നഗരങ്ങളിലും വിജയികള്‍ക്ക് നല്‍കുന്ന എവറോളിംഗ് ട്രോഫിയുമായിട്ടാണ് റോഡ് ഷോ വിഭാവനം ചെയ്തിരിക്കുന്നത്.

കേരളത്തിലെ അറിയപ്പെടുന്ന ശില്പികളിലൊരാളായ അജയന്‍ വി. കാട്ടുങ്ങല്‍ രൂപകല്പന ചെയ്ത് നിര്‍മിച്ച ചുണ്ടന്‍ വള്ളത്തിന്റെ രൂപത്തിലുള്ള എവര്‍റോളിംഗ് ട്രോഫിയാണ് വിജയികള്‍ക്ക് നല്‍കുന്നത്. ട്രോഫിയുമായി എത്തിച്ചേരുന്ന വിവിധ കേന്ദ്രങ്ങളില്‍ പ്രാദേശിക മലയാളി അസോസിയേഷന്‍ ഭാരവാഹികളുടേയും മറ്റു സാമൂഹിക സാംസ്‌കാരിക സംഘടനാ നേതാക്കളുടെയും നേതൃത്വത്തില്‍ സ്വീകരണം ഒരുക്കുന്നതായിരിക്കും. വള്ളംകളി നടക്കുന്ന സ്ഥലവും മറ്റു വിശദശാംശങ്ങളും പിന്നീട് അറിയിക്കുന്നതാണ്.

നോര്‍ത്ത് ലണ്ടനിലെ എന്‍ഫീല്‍ഡ് നഗരത്തിലെ പ്രസിദ്ധമായ സെന്റ് ഇഗ്‌നേഷ്യസ് കാത്തലിക് കോളജില്‍ വച്ചാണ് 'ആദരസന്ധ്യ 2020' നടക്കുന്നത്. 'കേരള പൂരം 2020' റോഡ് ഷോ ചടങ്ങില്‍ യുക്മ പ്രസിഡന്റ് മനോജ്കുമാര്‍ പിള്ള, ജനറല്‍ സെക്രട്ടറി അലക്‌സ് വര്‍ഗീസ്, കേരളാ പൂരം ജനറല്‍ കണ്‍വീനര്‍ അഡ്വ. എബി സെബാസ്റ്റ്യന്‍, ബോട്ട് ക്ലബ് മാനേജ്‌മെന്റ് ചുമതലയുള്ള ജയകുമാര്‍ നായര്‍, ജേക്കബ് കോയിപ്പള്ളി, റണ്ണിംഗ് കമന്ററി ലീഡ് പേഴ്സണ്‍ സി.എ. ജോസഫ് എന്നിവര്‍ പങ്കെടുക്കും.

നിലവിലുള്ള ചാമ്പ്യന്മാരായ ലിവര്‍പൂള്‍ ജവഹര്‍ ബോട്ട് ക്ലബ് ടീമിന്റെ 'തായങ്കരി ചുണ്ടന്‍' ക്യാപ്റ്റന്‍ തോമസ്‌കുട്ടി ഫ്രാന്‍സിസ്, ടീം സ്‌പോണ്‍സര്‍ ലവ് ടു കെയര്‍ മാനേജിംഗ് ഡയറക്ടര്‍ മാത്യു അലക്‌സാണ്ടര്‍ എന്നിവര്‍ ചേര്‍ന്ന് എവര്‍റോളിംഗ് ട്രോഫി യുക്മ നേതൃത്വത്തെ തിരിച്ചു ഏല്പിക്കുന്നതായിരിക്കും. തുടര്‍ന്നു വിശിഷ്ടാതിഥിയുടെ പക്കല്‍ നിന്നും യുക്മ ടൂറിസം ക്ലബ് വൈസ് ചെയര്‍മാനും റോഡ് ഷോ ക്യാപ്റ്റനുമായ ഡിക്‌സ് ജോര്‍ജ് ട്രോഫി ഏറ്റുവാങ്ങും.

റിപ്പോര്‍ട്ട്: സജീഷ് ടോം


Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക