മൗനസഞ്ചാരം (കവിത: തസ്നി ജബീല്‍ )

ഒരുപാട് നാനാര്‍ത്ഥമുള്ള

ഒറ്റ വാക്കാണ് മൗനം

പ്രണയത്തിന്റെ നനവാകാനും

പ്രതിഷേധത്തിന്റെ കനലാകാനും

കഴിയുന്ന മാന്ത്രികതയുണ്ടതിന് .

കടലോളം ആഴവും ആകാശത്തിന്റെ

അനന്തതയും ഒളിപ്പിച്ചു വെക്കാനുള്ള ഇടവുമുണ്ട് .

ചില മൗനങ്ങള്‍ക്ക് വാക്കുകളേക്കാള്‍

കനമുണ്ടാകും .

എന്നും മൗനം പൂണ്ടിരിക്കുന്നയാളെ

മിണ്ടാപ്രാണിയെന്നു തെറ്റിദ്ധരിക്കരുത്

പൊട്ടിത്തെറിക്കുന്നതിനു മുന്‍പേയുള്ള

അഗ്‌നിപര്‍വ്വതത്തിന്റെ ശാന്തത മാത്രമാകാമത് .

മിഴികള്‍ക്ക് മൊഴിയാനാവുന്ന ഏക ഭാഷയാണ്

മൗനം.

രണ്ടുപേര്‍ക്കിടയിലെ പിണക്കത്തിന്റെ

നിശ്ശബ്ദഭാഷയും മൗനമാണ്.

മൗനം ചിലപ്പോള്‍ സമ്മതവും

മറ്റു ചിലപ്പോള്‍ വിസമ്മതവുമാകുന്നു.

പ്രിയപ്പെട്ടവരുടെ മൗനത്തിന്നര്‍ത്ഥങ്ങളെ

നിഘണ്ടുവിന്റെ താളുകളില്‍ തിരഞ്ഞാല്‍ കണ്ടെത്തിയെന്ന് വരില്ല

മനസ്സിന്റെ താളുകള്‍ തന്നെ തുറന്നെടുക്കണം.