മുണ്ടില്ലാ മാലാഖമാർ നൽകുന്ന ജീവിത ദർശനം : മുരളീ കൈമൾ

ഇന്ന് പുസ്തകങളുടെ ദിനമാണ്

- എട്ടാമത്തെ മോതിരം ---

മാത്തുക്കുട്ടിച്ചായന്റെ

(യശശരീനായ മനോരമ പത്രാധിപർ കെ.എം.മാത്യു ) ആത്മകഥയാണ്.

പിന്നെയും വായിക്കുന്ന ,അതിൽ നിന്ന് ഊർജ്ജം ഉൾക്കൊള്ളുന്ന ജീവിത കഥ.

അതിന്റെ മൂന്നാമത്തെ അദ്ധ്യായം

" മുണ്ടില്ലാ മാലാഖമാർ "

നൽകുന്ന ഒരു ജീവിത ദർശനമുണ്ട്.

കെ.എം. മാത്യുവിന്റെ പിതാവ് കെ.സി. മാമ്മൻ മാപ്പിള(അക്കാലത്തെ മനോരമ പത്രാധിപർ) തന്റെ മക്കളും ,ഭാര്യയും ഒത്ത് ആലപ്പുഴയിൽ നിന്ന് കോട്ടയത്തേക്ക് നടത്തിയ ബോട്ട് യാത്രയാണ് ആ അദ്ധ്യായം.

യാത്രക്കാരായി ആ ബോട്ടിൽ കൊച്ചു മാത്തുക്കുട്ടിയും , സഹോദരി ഉമ്മാമ്മച്ചിയും തങ്ങളുടെ അപ്പച്ചനോടും അമ്മച്ചിയോടും ഒപ്പം.

ആലപ്പുഴയിലെ കുപ്പപ്പുറത്തു നിന്ന് വേമ്പനാട്ടു കായലും , ആർ ബ്ളോക്ക് , സി ബ്ലോക്ക് പാടശേഖരങ്ങളിലൂടെ കോട്ടയത്തേക്ക് ഉള്ള ബോട്ട് യാത്ര .

സി. ബ്ലോക്കിൽ കൂടി യാത്ര ചെയ്യവേ കുറ്റിയിൽ ഇടിച്ച ബോട്ടിൽ ജലം കയറാൻ തുടങ്ങി.

അന്ന് അവിടെ വരമ്പിൽ കട്ടകുത്തുന്നവർ വന്ന് ഉടക്കിയ കുറ്റിയിൽ നിന്ന് ബോട്ട് പൊക്കി മാറ്റി ആ കുടുംബത്തെ രക്ഷിച്ചു.

എവിടെ നിന്നോ ഓടി വന്ന് തങ്ങളെ ജീവിതത്തിലേക്ക് കൈ പിടിച്ച് കയറ്റിയവരോട് ഉള്ള നന്ദി പറയാൻ കെ.സി. മാമ്മൻ മാപ്പിള ഒരുങ്ങി.

ഇനി ആത്മകഥയിലെ വരികളിലേക്ക്

_"അവരാരാണെന്നും , പേരെന്താണെന്നും അപ്പച്ചൻ ചോദിച്ചപ്പോൾ അവർ പേരു പറഞ്ഞു

അപ്പോൾ അപ്പച്ചൻ ചോദിച്ചു

---ഞാനാരാണെന്ന് അറിയാമോ?

വള്ളം കിടക്കുന്നിടത്തേക്ക് തിരിച്ചു നടക്കുന്നതിനിടയിൽ അവർ പറഞ്ഞത് പിന്നീട് അപ്പച്ചൻ ജീവിതം മുഴുവൻ കൊണ്ട് നടന്ന ഒരു മറുപടിയായി.

ആ മറുപടി ഇങ്ങിനെയായിരുന്നു.

- നിങളാരാണെന്ന് ഞങൾക്ക് അറിയില്ല. അറിയേണ്ട കാര്യവുമില്ല

അതു പറഞ്ഞ് അവരങ്ങു പോയി. തങ്ങൾ സഹായിച്ച കെ.സി. മാമ്മൻ മാപ്പിള , അറിയപ്പെടുന്ന ആളാണെന്നും, ആ ആൾക്ക് പത്രമൊക്കെ സ്വന്തമായുണ്ടെന്നും അവർക്കറിയേണ്ട കാര്യമെന്ത്? ആർക്കോ സഹായം ആവശ്യമായി വരുന്നു. നമുക്ക് ആവുന്ന രീതിയിൽ സഹായിക്കുന്നു. സഹായിച്ചത് ആരെയാണെന്നും, അയാളുടെ കുടുംബ മഹിമയും, പ്രതാപങളുമൊന്നും അറിയാൻ നിൽക്കാതെ തിരിച്ചു പോവുന്നു.

ലളിതമായ ജീവിത ദർശനം.

ഈ കഥ എനിക്ക് പറഞ്ഞു തരുമ്പോഴൊക്കെ ഉമ്മാമ്മച്ചി പറയും

-"മാത്തുക്കുട്ടി , ലോകത്ത് നല്ലയാളുകളും ചീത്ത ആളുകളുമുണ്ട്. അവര് നല്ല ആളുകളായിരുന്നു.

അപ്പച്ചൻ അവർക്കൊരു പേരിടുകയും ചെയ്തു.

" മുണ്ടില്ലാ മാലാഖമാർ-"

എട്ടാമത്തെ മോതിരം- കെ.എം.മാത്യു.

മൗണ്ട് വാർദ്ധയിലെ വീട്ടിലെ സ്വീകരണ മുറിയിൽ വെച്ചാണ് ഈ പുസ്തകം സ്നേഹപൂർവ്വം മാത്തുക്കുട്ടിച്ചായൻ തന്നത്.

ഇന്ന് പത്താമുദയം,

മലയാള മനോരമയുടെ ചരിത്രത്തിൽ ഏറെ പ്രാധാന്യമുള്ള ദിനം.

ലോക പുസ്തക ദിനത്തിൽ , അക്ഷര നഗരിയെ ഈ നാമധേയത്തിലെക്ക് കൈപിടിച്ച് നടത്തിയ കെ.എം. മാത്യു എന്ന വലിയ മനുഷ്യന്റെ ദീപ്ത സ്മരണകൾക്ക് മുൻപിൽ പ്രണാമം.

മുണ്ടില്ലാ മാലാഖമാർ നൽകുന്ന ജീവിത ദർശനം : മുരളീ കൈമൾ

PATHRANGAL

US WEBSITES

EMalayalee Available in MediaAppUSA